حديث ومغزل مع سناء الزعيم - شهيوات المستمعات
اليوم في حديث ومغزل مع سناء الزعيم قدمو لينا المستمعات مجموعة من الوصفات المختلفة و هذه البعض منها :
* مريم من فاس : الدجاج في الفرن // في طنجرة تنصبي الدجاجة بالملح و الابزار ، الزعفران ، 2 أوراق سيدنا موسى و تغطيها بالماء نخليوها تسلق و فاش تغلى نضيفو الزعيترة ثم نقطروها و نلويوها في الأليمينيوم و تدخل للفرن لتشوى و تقدم مصحوبة بالبطاطس مقلية و صلصة الطماطم و سلطة الخص .
* هدى من الداخلة : الفلان باللوز // رابعة لوز مطحون بقشوره ، 400 غرام سنيدة ، 10 البيضات ، كأس كبير من الماء الدافئ ، 2 فانيلا ، و للتزيين الكاراميل اللي غادي نوجدوه بالسكر مع شوية الماء و نخليوه يذوب و يتعسل فوق عافية مهيلة ثم نخلطو المقادير.
نوضعو الكراميل هو الأول في المول و نكبو الخليط ديال الفلان و ندخلوه للفرن في حمام مريم لمدة 45 دقيقة الى ساعة و فاش يبرد يقلب في طبسيل و يقدم بالصحة و الراحة .
* اشراق من فرنسا : الحلوى ديال الوردة // رابعة ديال الزبدة ، كأس زيت ، كأس سكر ، كأس زبيب مقطع ، كأس زنجلان محمر ، خمارة حمراء ، دقيق حسب الخليط و كأس ماء الزهر .
تخلط الزبدة بسنيدة مزيان ثم الزيت و ماء الزهر ثم الزنجلان و الزبيب و خاص العجين تكون خفيفة و رطبة ثم تدلكيها و ترشميها بطابع الوردة ثم تتحمر في الفرن و تفند في سكر كلاصي .
- حلوى الكاوكاو : كيلو كاوكاو مقشر و مطحون ، زلافة سكر سنيدة ، زلافة الزيت و الدقيق حسب الخليط ، يخلط الكل و الدقيق تدريجيا حسب الخليط ثم تجمعيها صبيعات و تدخليها للفرن بدرجة حرارة 180 درجة ثم تفند في السكر كلاصي و توضع في كويغطات .
* فوزية من البيضاء : بسطيلة بالسردين // كيلو سردين محيدة ليه القشرة ديالو و نشرملوه بالتحميرة و الابزار و الكامون و سكينجبير و السوداني ، القزبر طري مدقوق ، شوية الزعفران ، ثومة كارمة ، وفي الطحان يطحن الكل مع اضافة الملح .
4 الخيزويات كبار محكوكات و مشحرين في مقلا مع الملح و الابزار و نصف ضامة البنة ديال السمك و شوية زيت العود ، على نار مهيلة ، ونفس الشيء بالنسبة ل 2حبات من الكرعة الخضراء .
في كاسرنة فيها شوية الماء نوضعو فيها السردين ونطيبوه ثم نضيفو ليه الخضر و الشعرية الصينية نطيبوها بحال الروز مع الماء و ضامة البنة و الملح و الابزار وفاش تبرد نضيفوها للمقادير الأخرى .
تاخذي الورقة ديال البسطيلة وتبداي تجمعي بحال الكموسة و تجمع على شكل وردة ، وتدهن بالزيت و تدخل للفرن و الا بغيتي تخليها في المبرد لاتدهن بالزيت .
*عيشة من الكارة : طاجين السمك // 1 كيلو من الفرخ مشرمل مع الثومة و الربيع و الحامض معصر و العطرية ديال الحوت ثم نضيفو ليه خيزو ، فلفلة مشوية ، ثم تفرشي طبقات في الطاجين و تزيدي شرائح الحامض الطري في الأخير تضيفي ورقة سيدنا موسى و الأزير ونخليوه يطيب بالمهل ونقدموه بالصحة و الراحة.
Publicité
