*نجوى من الناظور : الدجاج مقلي // صدر الدجاج و ياغورت طبيعي و معلقة صغيرة من الهريسة ، معلقة سكينجبير ، راس معلقة من الابزار ، يخلط الكل و يقطع لأصابع ثم تضيفي الياغورت لمدة نصف ساعة ثم ناخذو الخبز الكارم و تحمريه ثم تطحنيه و تاخذي أطراف الدجاج و تمرمديهم في الخبز المطحون و تقليهم .
- بطاطس مقطعة على شكل فريت نوضعوهم في الماء و الملح و تغليهم نصف غلية ثم في صينية الفرن مع زيت الزيتون و التحميرة و الابزار و توضعيها في الفرن تتحمر.
- المسمن : 2 كيلو دقيق ، 2 بيضات و 3 معالق من الزبدة و خنشة خميرة ديال الكيكة و معلقة كبيرة من خميرة الخبز و تعجني مع الملح و السكر و شوية العسل و نخليوه يرتاح نصف ساعة و تكوريها و تطوي الأول عادية بالزبدة ثم الثانية تسرحيها و تديريها وسط الأول ثم تدهني اللاطة و تديري شوية الزبدة على الوجه .
* عيشة من العيون : غريبة بالبرتقال // نصف كيلو ليمون غليظ محكوكة القشرة ديالو و 2 خمارات حمرين و 2 كيسان سكر و 2 كيسان زيت و 2 كيسان كوك و 2 بيضات ، تخلطي بالدقيق حتى تجمع مزيان ثم تكوري و تغطسيهم في أبيض البيض و تفنديهم في الكوك و تدخليها للفرن و تردي البال دغيا كتطيب.
* فاطمة الزهراء من البيضاء : بيتزا //
العجين : 280 غرام فرص ، معلقة صغيرة من الخميرة حبوب ، 1 بيضة و نصف كأس زيت العود و الخميرة تذوب في نصغ كأس حليب و تجمعي العجينة بحليب دافئ و تدلكي مزيان ثم تخمر شوية و تكرصيها و يرتاحو ثم تدلكيها .
الحشوة : صلصة الطماطم ، ملح ، ابزار ، راس الثومة ، راس معلقة من السكر و من الفوق الطون و الزيتون الأسود و الفرماج .
الحشوة 2 : 2 بصلات مشحرين في زيت العود ، الزيتون الأخضر مقطع دواور ، ملح ، ابزار ، 3 معالق كبار من القشدة الطرية و فاش تطيب تزيدي ليه 2 حكاك طون و تعمري العجين و تحكي الفرماج و تطيبيها .
*حجيبة من مكناس : الفلان بالفواكه // 1لتر و نصف من الحليب يتقسم على 3 ، 2 بنانات ، 2 تفاحات ، نصف كيلو فريز ، 1 كأس عصير البرتقال و شوية مايزينا ، تخلطي الكل نصف لتر مع نكهة مختلفة ، و تسكبي في اناء الكيك الخليط الأول ديال الفلان حتى يشد راسو ثم الثاني حتى يجمد و الثالث كذلك ونبيتوه في الثلاجة و في الغد تقلبيه ثم تزيني بالفواكه : الفريز مربعات يوضع في الوسط و الفواكه الأخرى شرائح دائرية على الأطراف .
عصير البرتقال مع المايزينا ثم حتى يبرد شوية تسكبيه على الفواكه فقط و تديريه في الثلاجة حتى يبرد مزيان و تقدميه بالصحة و الراحة.
* أم سوار من مكناس : طريقة تذويب الشكلاط // 100 غرام شكلاط و 2 معالق كبار من الماء و تديريه في حمام مريم و يفضل يتحرك بملعقة خشبية .
- شباكية سهلة للمبتدئات : رابعة فرص ، نصف كأس زبدة مذوبة ، 1 فانيلا ، نصف خمارة حمراء ، ملح ، كأس من ماء الزهر يرمل الخليط بالدقيق بالزبدة مع اضافة العناصر الأخرى و باش ماتكورش تخلطي الملح مع الفرص و تجمعي بماء الزهر مثل عجينة الخبز ، في الصباح تدلكيها و تخليها رقيقة و ترشميها بالجرارة أو بالطابع ثم تقلى في الزيت ثم في العسل أو في السيرو : 2 كيسان سكر ، 2 كيسان ماء ، نصف حامضة معصرة أو شرائح وبلا ما تحركي بالملعقة فقط بالكاسرونة ثم تسقي به الشباكية .
* صفية من الصويرة : عجين اللوز // كيلو من اللوز البلدي ، كأس حتى 2 كيسان من السكر حسب الذوق ، رابعة الزبدة و شوية ماء الزهر ، يسلق اللوز و من الأحسن يقشر و يبات أو اذا كانت السيدة زربانة تحمريه شوية في فرن ساخن ثم يطحن و تذوبي الزبدة و السكر و ماء الزهر و تجمعي العجين مع دلكها جيدا .
*غزلان من البيضاء : الفرماج ديال الدار // 1 كأس حليب سائل ، 1 كأس حليب غبرة ، 1 كأس زيت 2 قطع فرماج مثلث و شوية الزعتر ، تخلطي الكل مع زيادة الزيت شوية بشوية حتى يعقاد و توضعيه في قنينات زجاجية معقمة .
فتيحة من مراكش : الجبن بنكهة زيت العود // نفيضو نصف لتر من الحليب ثم تضيفي ليه خل عادي و خل التفاح ثم تخليه يرتاح مدة 5 دقائق و تصفيه في ثوب حياتي أو شبكة حتى يقطر مزيان و في الأخير تنسميه باضافة زيت العود و الزعتر .
